مهام مهندس المكتب الفنى

عارف إن وظيفة مهندس المكتب الفني تعتبر من أهم الوظايف في أي مشروع على الإطلاق...؟
طب يعني إيه أصلاً مهندس المكتب الفني؟ و إيه مسئولياته؟ و إزاي تبقى مهندس مكتب فني..؟

سواءً كانت الشركة تتبع المالك أو الإستشاري أو المقاول لازم يكون عندهم قسم اسمه قسم المكتب الفني أو على الأقل مهندس بيقوم بمهام المكتب الفني
المكتب الفني لأي مشروع بيكون عبارة عن من مجموعة من المهندسين يرأسهم مدير المكتب الفني و يتبع إدارة المشروع مباشرةً، و مهندسين المكتب الفني بيكونوا مسئولين عن العديد من الوظائف الهامة و اللي بنعتبرها عصب المشروع و مانقدرش نستغنى عنها زي:

• إعداد مقايسة المشروع
• عمل حصر الكميات الهندسي للبنود من اللوحات
• تحليل أسعار البنود و تسعير المقايسة
• إعداد و تجهيز كافة المستندات اللازمة لدخول المناقصات
• إعداد البرنامج الزمني للمشروع و عمل منحنى التدفق المالي
• إستلام الرسومات الهندسية المعتمدة من إستشاري المشروع و توزيعها على الإدارات المختلفة ( إدارة التنفيذ- إدارة المشتريات- إدارة التخطيط و المتابعة- إدارة المشروع )
• مطابقة اللوحات المعمارية مع اللوحات الإنشائية و مع لوحات الإلكتروميكانيكال
• إجراء التعديلات اللازمة على الرسومات و ردها للإستشاري للمراجعة و الإعتماد

• عمل الرسومات التشغيلية Work shop drawings
• إعداد الرسومات طبقاً لما تم تنفيذه على الطبيعة As built drawings
• عمل تعديل الأسعار و تقديم المطالبات المالية للمشروع
• إعداد مستخلصات المالك و مستخلصات مقاولي الباطن
• تمثيل الشركة في الإجتماعات الدورية
• إعداد جميع ورقيات و تقارير المشروع
• إجراء المخاطبات و المراسلات مع كل أطراف المشروع
• حفظ جميع ملفات المشروع من مستندات و مخاطبات و محاضر إجتماع و تقارير و لوحات و مستخلصات بالمكتب الفني
• توثيق تسليم و إستلام المستندات و المخاطبات و اللوحات بين جميع العاملين بالمشروع

إزاي بقى تبقى مهندس مكتب فني..؟

عشان تشتغل مهندس مكتب فني لازم تتعلم شغل المكتب الفني زي الحصر الهندسي و المستخلصات و الشوب درووينج و التسعير.. و لازم كمان يبقى عندك فكرة كافية عن إدارة المشروعات زي العقود و المناقصات و البرامج الزمنية... إلخ
البرامج الأساسية اللي لازم تكون عارفها كويس هي الأوتوكاد و الإكسيل.. و لو عاوز تبقى محترف يبقى يفضل تتعلم كمان البريمافيرا و الريفيت
يفضل يكون عندك فكرة كافيه عن شغل التنفيذ عشان تقدر تكون متميز في المكتب الفني
لو انت لسه طالب و ما اخترتش مشروع التخرج بتاعك يبقى يفضل لو اخترت مشروع " إدارة مشروعات " ده هايساعدك في شغل المكتب الفني
روح مركز بحوث الإسكان اللي في الدقي و اشتري من هناك "كود إدارة المشروعات " و ذاكره كويس.