إنجاز علمى للدكتور المصرى الشاب أنيس حنا

 

 18 مليون شخص بيموت سنويا بسبب جلطات القلب عشان كده بيسموا المرض ده (القاتل الاول للبشر) ودي بداية عشان نتعرف علي شاب مصري يعتبر نموذج مشرف لمصر وللوطن العربي ويثبت ان الشباب العربي قادر علي الابتكار وتحقيق الانجازات اذا توفرت له البيئه الجيدة والامكانيات.

الشاب ده اسمه (أنيس حنا) دكتور مصري عنده 28 سنة من اسيوط اتخرج من كلية الطب جامعة الاسكندرية وسافر يكمل دراسة الدكتوراة في جامعة (ألبيرت إنشتاين) بنيويورك وأثناء وجوده هناك قدر يوصل هو والفريق البحثي الي معاه للجينات المسؤله عن شفاء جلطات القلب.
والانجاز ده عمل ضجه كبيرة في الاوساط الطبية والعلمية في العالم وتم نشر البحث في أشهر المنصات الطبية علي مستوي العالم.
وده ساهم في ان منظمة القلب الامريكية ومعاهد الصحة الأمريكية يقدموا تمويل مادي كبير لأنيس وفريقه البحثي عشان يكملوا ابحاثهم.

وحسب كلام أنيس لموقع سكاي نيوز عربية ان التجارب تمت ونجحت علي الفئران وهيحتاج وقت حوالي من 3 الي 5 سنين عشان يتم انتاج دواء صالح للبشر.

شئ مفرح ويدعو للفخر تواجد شباب مصري ذي أنيس يكون خير سفير لمجتمعنا المصري والعربي في الخارج.